Хьурай

Я жемятар,къе алимар кlватl хьурай,
Гьялиз чlалан проблемар-сад хьурай!

Чlалан винел дяве физ я мусанлай,
Вичин эхир сад Аллагьди асантрай,
Тlа алимар чи гъефлетда ксанва-
Гьар куткайда чlал туькуьруьн хъсан ян?
Я жемятар,къуй алимар кlватl хьурай,
Гьялиз чlалан проблемар сад хьурай!

Гьуьжетариз сецихъ галаз гагьул туш,
Туькьуьл гафар галачиз жен макъул-туш!
Валлагь има веже къведай са тlул туш,
Хъилен мецев рахадайди акьул туш,
Сабур галай,чидай ксар кlватl хьурай,
Гьализ чlалан проблемар сад хьурай!

Санал атуй,са къайдада турай чlал,
Акваз тушни абруз чlалан авай гьал?
Гьарада вич галай патахъ ийиз ял,
Гьикьван жеда фагъир чlалан кьилел къал?
Я жемятар,къуй алимар кlватl хьурай,
Гьялиз чlалан проблемар сад хьурай!

Накьанди туш,къадимди я лезги чlал,
Бубайри тур руьгьдин девлет,ризкьи чlал...
Халкь амукьдан чаз,квахьайтlа бес чи чlал?
Хуьз хьанайтlа чавайни къе кешки,чlал...
Я жемятар,къуй алимар кlватl хьурай,
Гьялиз чlалан проблемар сад хьурай!

Садани къе амукьтурай хатурар,
Къуба,Дербент,Ахты,Стlал,Стlурар
Къенин йкъуз чlалан кимел атурай,
Гьатнавай къал,итlи-битlи атlурай,
Я жемятар,къуй алимар кlватl хьурай,
Чlал хуьн патал и пад,а пад сад хьурай!

Гьар са халкьдин дувул я чlал,тан я чlал,
Ваъ,халкь я тан-танда руьгь я,чан я чlал!
Са миллетдин уьмуьрдин яш,сан я чlал,
Халкь халкь жедай сифте шартl хьиз кlан я чlал-
Я жемятар,къуй алимар кlватl хьурай,
Чил кьвед хьана-чlал хьайитlан сад хьурай!

Гьял тавуртlа,чи кlвалахар кьеж жеда,
Икьван чlавди чаз хьайибур гьич жеда,
Чlал кьейитlа,душманриз чи гьяз жеда,
Къе тахьайтlа пака и кар геж жеда...
Я жемятар,къе алимар кlватl хьурай,
Гьялиз чlалан четинвилер,сад хьурай!