Тавуртlа

Инсанар къвердивай ава дегиш жез,
Лугьуда гьикl жеда,лугьун тавуртlа?
Умудиз кlан жеда белки дуьз хъжен,
Умудда гьикl жеда,умуд тавуртlа?

Гъиле кьуркьан ава,мецел таб алаз,
Герек ян,шайтандиз ябни акалаз,
Вири алакъаяр ихьтиндахъ галаз
Атlуда гьикl жеда,атlун тавуртlа?

Дуст кьуна,рикlин сир гузватlа эгер,
Ийизва намертвал гьич мумкин тежер,
Адан вичиз и кар,хадай дуьз рикlер,
Хъавуртlа гьикl жеда,хъавун тавуртlа?

Чарадкай гаф лугьуз,фитне авурла,
Масадан вилевай са чlар акурла,
Амма жуван виле кlарас такурла,
Къалурда-гьикl жеда,къалур тавуртlа?

Чlехи-гъвечи амач,амач гьуьрмет-гьакь,
Жегьилар акатда крарик нагьакь,
Бубайрин вилериз авудда бармакl,
Сабурда-гьикl жеда,сабур тавуртlа?

Агьилри ийизвай ихтилат,сугьбет,
Атlана,кутада абурик гъелет,
Абур хуьн паталди тагайла зегьмет,
Акуртlа гьикl жеда,акун тавуртlа?

Сада мярекада чеб кьуна виниз,
Масадан гафариз ягьанатариз,
Рахайла,залан гъуд,вегьенвай,сивив
Акьуртlа гьикl жеда,акьун тавуртlа?

Намик,вавай ибур дуьз хъийиз жедач,
Шиирар кхьинал кар виже къведач,
Лап лугьун гафари затlни ийидач...
Авуртlа гьикl жеда,авун тавуртlа?
15.12.16 г.