Лезги сайтариз...

Хвеши хьанай,лезги сайтар акурла ина,
Дидед чlалал рахаз жез тир дуьньяд виринриз.
Хайи чlалан верцlивилел кхьин-кlелунар,
Мелгьем хьтин куьз хьанай зи руьгьдин деринриз.

Лув акатна,хкаж хьана гевил цавариз,
Кьезил хьана,кlвачин кlаник чил гьисс хъувунач.
Илгьам лугьун,гьевес лугьун-какур цlарариз
Худ гана за хъсан,я пис лугьун тавуна.

Мискьивалнач дустарини,"хуш я" эцигна,
Устадрини меслятар гана,алакьдай.
Зани-авай,жедай гъалат жуван,хъецикна,
Чидайбурин чlалахъ хьана,дуьзриз алахъдай.

Дидед чlалал садран лугьуз тахьай байихар,
Садлагьана,агьил чlавуз зи.уях хьана.
"Зур асирдин вахт алатна,ваз им лайих ян?"
Лугьудайбур хьанатlани,рикl булах хьана.

Чlалакайни и сайтара ихтилат хьана,
Халкьдин амай дердерикай лугьудайбурни.
Себни жедай пайирбуриз чи миллет,кана,
Тlимил тушир чахъ тапардай чан кудайбурни.

А пад,и пад талгьана,чун са хзан хьанвай,
Чун пайирбур,сагъ амайтlа,пад жедайвал тир.
Яргъараваз,рафтарвилер чи асант хьанвай,
На лугьуди,интернет-сайт са хайи кlвал тир.

Яваш-яваш чlехи хьана хзанни,кlвални,
Къалар гьатна са дидедин авладрин къене.
Гьармасада вичин патахъ епин кьил ялна,
Сецихъ галаз гьуьжетарна,галатриз чене.

Садаз садан гаф туьтенлай галатиз туш мад,
Татукьвилив,герек хьайтlа,жавабарни гуз.
Агакьнава мурадривди-авурди,кьве пад
Гила чун вич хьанва ийиз жува-жув,агъуз.

Вуж вуж ятlа чир жезава,акурд туштlан чин,
Гьим хъуьтуьл я.гьим туькьуьл я-малум жезава.
Вучиз икьван гъвечlи халкьдин,чlехи ятlа кин-
Вучиз икьван верцlи чlалаз туькьуьл мез ава?

Гъил къачу-заз чида,квез зи гафар дакlан я,
"Викlегьвална" лагьана за-интернет я ман!
Куьн сагърай-заз и сайтарай экъечlиз кlан я,
Гьеле хьи,чи арада са гьакь-гьуьрмет ама...
24.04.18 г.