Басня

Хъалхъас хъипрен шарагди
Туьд кlваликай хкудна,
Патагвай къиб маракъдив,
Килигунрай акъудна.

Вил ацlакьна,течизни
Вуж я-цlалцlам хамунал.
Авач лугьуз вичизни,
Агаж хьана гъамунай.

Ракъунин нур акьаз,къиб
Адаз  ийер акуна.
Пехилвализ ажайиб,
Хъалхъас къиб лап дакlуна.

Квахьна ийир-тийир лап,
А югъ,и югъ адан мад.
"Куьз герек я и кlараб",-
Хъуьтlхъуьз хъиляй жезвай пад.

Йифди-югъди шехьиз тир,
Кстахвал квай хъилериз.
Дидед са жуьр эхиз тир,
Дерт ахъайиз чилериз.

"Алаж,-лугьуз авай ам,-
И кlараб зи винелай".
Алукьзавай цавай ам,
Хкадар жез чилелай.

Дидед гъизвай делилар,
Ийиз тир ам япалай.
Кьунвай адан диливал,
Акат тийиз гаф,лагьай.

Дидед вучрай,язухди
Эхир чара тахьана,
Кlваликай азад хьунин
Сир баладиз лагьана.

Шадвиляй хкадарна,
Бицlи ахмакь,хъалхъас къиб.
Вичин къабух гвадарна,
Геляйна ам тапасдив.

Дуьнья вичиз гайи хьиз,
Авай ама сифте къар.
Вежинайни кьан тийиз,
Хъалхъас хъипер,тай-дустар.

Чарадкай дуст кьаз тир ам,
Вичинбурихъ кlур вегьиз.
Хъипериз ийиз икрам,
Хъалхъас хъипер тир негьиз.

Пара фенач хуш йикъар
Тlебиатдин,гъил гудай.
Гагь агъвана къайи гар,
Гагь рагъ жез тир,кьил кудай.

Рагъ ифейла,куз хьана,
Марф акьаз,ам кьежена.
Хьана адан гьал чlана,
Гьатна чанда кичlерар.

Кlан хьана хьи,къабух мад,
Ахлукlан вичин кулал.
Гьинва-амач фейи пад,
Далуни-дуьздин кьулал...

...Гьикl хъхьана адан гьал-
Чидай са мерд авач хьи.
Акьулдай къведай завал
Хьтин гьич дерт авач хьи.

Лагьайтlа гаф,фасагьат:
Гьармадаз са пай ава.
Им-кьисадин несигьат:
Гьардаз вичин тай ава.
01.01.18 г.