Июлдин варз – багъ цуькведа,
Вун са цуьк яз атана.
Кьуд пад иер тир береда,
Руьгьдин ракIар гатана.
Агат хьана мукьва-кьили,
Ваз алхишар пара я,
Кьадар авач чи шадвилихъ,
Вун хтана Сурая !
Буба шад я, диде гумрагь,
Эциг тийиз чилерал.
Циферикай хкатай рагъ,
Вун-багърийрин гъилерал!
Малаикдин къилихар вахъ,
Вун са хаму жейран я.
Авайди туш синихар вахъ,
Вун акваз чун гьейран я.
Тарифар туш, лугьузва гьахъ:
Т1авус хьиз вун гуьрчег я.
Икьван тамам,квач к1ус дамах,
Ви хесетар керчек я.
Вун дуьньядал атай къалай,
Хъуьт1уькай чаз гад хьана.
Кьулухъ ирид стха галай,
Вах хьурай вун,сад хьана.
Умудрин югъ, гатфарин цуьк,
Гьамиша сувар хьурай!
Зун патал вун, эмедин рик1,
Мурадрин лувар хьурай!
10.07.2018
Сураядиз
© Copyright: Тамила Хуршидова Салманова, 2019
Свидетельство о публикации №119120409436
Свидетельство о публикации №119120409436
Рецензии