(са дишегьлидин гафарай кхьей шиир)
Ажайиб чаз вахтар я хьи,
Везифаяр дегишзавай.
КIвал хуьзвайбур папар я хьи,
Шал бармакдал дегишзавай.
Эркекрив гьич кьан тийидай,
Бушвилер гвай ксар хьанва.
Са дишегьли вад итимдай
Ише фидай вахтар хьанва.
Темпелвилихъ кьадар авач,
Чанта – къирмиш, югъ – кечирмиш.
Руьгьда уьтквем къастар авач,
Чин кайила, жез тепилмиш.
Гьафтейрикай йисар жезва,
КIвалахдикай кьил къакъудиз.
Хзан санлай бизар жезва,
Уьмуьр ухшар тир агъудиз.
КIвалин кардик кьил кутадач,
Къецепата шагь-пачагь я.
Мецелай дуьз гаф жагъидач,
Адакай рахун гунагь я.
Жуван дердер ахъайдай кьван,
Мецикай зи кIараб хьанва.
Валай фейид ацалтрай вал ,
Вун акваз,зун кабаб хьанва.
Вакай чи рикI ая рази,
Вун инсандин юнда хтур.
ТIалабун я, дуьа я зи,
Вун итимрин дунда хтур.
9.09.2018.
Ажугъ
© Copyright: Тамила Хуршидова Салманова, 2019
Свидетельство о публикации №119112101697
Свидетельство о публикации №119112101697
Рецензии