Зулун вахт тир зун ви кIвализ атай югъ,
Бубад кIваляй зун стхайри рекье тур.
КIватI хьана халкь, зуьрне-далдам гатай югъ,
КьетIен югъ за уьмуьрлух вун рикIе тур.
Вун асландин къуршах авай пагьливан,
"Дагъустандин чемпион" тIвар къачунвай.
Муьт1уьгъарнай зи жегьил рик1 даиман
Зун,чиг руш яз гьеле дуьнья такунвай.
Гьа йикъалай ваз вафалу свас я зун.
Вун заз даим экв -чим гузвай рагъ хьана
Мягькем пару,заз играми кас я вун.
Вун акваз руьгь лигим хьана,сагъ хьана.
Шукур хьурай Сад-Аллагьдин кьадардиз,
Чи веледар-чи садвилин емишар,
Фейи йисар чи,саналлаз мадардиз,
Са куьнивни ийидач за дегишар!
Чи пуд бала умудар я,цуьквер я,
Бахтлу авун везифа я чи кьведан.
Кьве хвани руш чи гьар йикъан эквер я,
КIвални хзан мурад я хьун авадан.
уьмуьрдин юлдашдиз
© Copyright: Тамила Хуршидова Салманова, 2019
Свидетельство о публикации №119111508027
Свидетельство о публикации №119111508027
Рецензии