Сагъйа

Сагъйа деп Сафа бла Маруа тёшлени арасында чапханнга айтадыла. Сагъйа - хаж къылгъанны адетлеринден бириди.
Сагъйаны биринчи этген тиширыу болгъанды. Ол Хаджар - Ибрахимни къатыны болгъанды. Хаж къылгъанны ол кесегин этерге тиширыулагъа буюрулса эди, сагъйаны жалан да ала этерик эдиле. Алай сагъйаны этерге битеу хаж къылгъанлагъа буюрулгъанды.
Ибрагим къатынын Хаджарны бла кёп болмай туугъан жашын Исмаилни бусагъатда Кааба тургъан жерде къойгъанды. Ол заманда Кааба болгъан жерде адам жашамагъан, не ханс, не терек ёсмеген, къум тюзле болгъандыла.
Бир къауум кюнден сора Хаджарны ашы – суу бошалады. Хаджар тургъан жерни къатында Сафа бла Маруа тёшле болгъандыла. Хаджар Сафа тёшге минип, аны башындан адам не да суу кёрюр муратда тёгерекге къарап болгъанды. Сора Маруа тёшге чапханды. Анга минип, тёгерекге къарагъанды.
Алай бла ол юч кере Сафа тёшге миннгенди эм да терт кере – Маруа тёшге миннгенди. Ахыр кере Маруа тёшню башында болгъанында, бир ауаз эшитеди.
Сора Исмаилни къатында Жабраил мелек керюннгенди. Ол къанатыны къыйыры бла жерни къазгъанды, эм ол жерден суу барып башлайды. Асыры къууаннгандан Хаджар кеси кесине келялмай тургъанды. Ол олсагъатдан къошунун суудан толтуруп башлайды. Жабраил мелек анга айтханды: «Къоркъма, сиз ёллюк тюйюлсюз. Бу жер – Бейтуллахды (Аллахны юйюдю). Бейтуллахны бу сабий атасы бла ишлер. Аллах сизни тас болургъа къоймаз».
Сагъйа хаж къылгъанны бир кесеги болуп Хаджарны тезюмлюлюгюне хурмет этер ючюн тохташдырылгъанды. Сагъйа (Сафа бла Маруа тёшлени араларында чапхан) хаж къылгъанны бек магъаналы кесеклеринден бириди.