И дуьньядал чун кьвед алаз,
Ават1ани чизвачир чаз.
Хабарсуз мугьман хьана заз,
Хуш суьгьбетна,гвачиз гьич наз.
Мензилрилай хабарар гъиз,
Танишвилиз рехъ ачухна.
Фадлай чизвай дустари хьиз,
Сада-садаз рик1 ачухна.
Гила жуваз кьарай амач,
Бейнида ви сифет ава.
Валай гъейри хуш кас авач,
Зи руьгьда ваз гьуьрмет ава.
Йифен аршдай, экуь гъед хьиз,
Вун нур хьана, хъуьрезва заз.
Экуьн кьиляй, хуш сегьер хьиз,
Тазавал гваз элкъвезва зал.
Хиве кьазва, заз зун чизмач,
Ви гьиссерин есир хьанва.
Зун паталди йиф, югъ амач,
Вун зи шагь, зун везир хьанва.
Ширин мецел, рикIяй михьи,
Гъиле кьуна, куькIуьрна шам,
Алхишзава квез енгеди:
"Бахтлу хьурай чи свасни чам !"
Гъил-гъилеваз твах куь уьмуьр,
Гьала Селем, шаддиз девран.
Сада-садан кефи хамир,
Ви къуллугъда жеда Кемран!
Селемни Кемран
© Copyright: Тамила Хуршидова Салманова, 2019
Свидетельство о публикации №119103007033
Свидетельство о публикации №119103007033
Рецензии