Зи рухвайриз

  

Куьн кьведни са нур я дидед пелевай,
Зи умуддин цIирер я куьн рикIевай,
Сечме тумар зи уьмуьрдин никIевай.
Квев пичIивал агуд мийир, рухваяр.

Тай жез тахьуй крчар алай гьайвандин,
Михьивал хуьх намусдинни виждандин,
Веледар  хьухь  жуван хайи ватандин.
Квев   кич1евал агуд мийир, рухваяр.

Ахъай мийир туьхк1уьр тежер гъалат1ар,
Сабур, абур хьурай квев гвай алатар,
Кьилин макьсад тахьурай куь манатар.
Квев нашивал агуд мийир, рухваяр.

Сада садаз куьмекни це уьмуьрда,
Дустни душман аваз ая фикирда,
Гъафил хьана гьатиз тахьуй суьгьуьрда.
Квев гиживал агуд мийир, рухваяр.

За тавакъу ийизва квез к1евелай,
Дидедин чIал ракъур мийир рикIелай.
Алатмир куьн  садрани дуьз рекьелай,
Квев ичIивал  агуд мийир,рухваяр.

Чира куьне гьар жуьредин илимар,
Бягьсерани ая беден  лигимар,
Хкатдайвал квекай викIегь  итимар,
Квев къуьруьвал агуд мийир, рухваяр.

Куьн вафалу хьайт1а  диде- бубадиз.
Пак адетриз, дагъви къанун-къайдадиз
Шукур гъида за гьамиша Худадиз,
Зав асивал агуд мийир, рухваяр.

Майил мийир са ч1авузни гьарамдиз
Шалвардин ч1ул яхъ гьамиша т1арамдиз
Куьн хайи хам къекъведайвал хуррамдиз.
Зав рехивал агуд мийир, рухваяр.

Такабурвал  агъузмир куь кьилерин,
Куьн гележег   чи путарин-хилерин,
Куьн кьвед кьве экв я дидедин вилерин,
Зав мичIивал агуд мийир, рухваяр.

Куьн зи ругьдин хцивал я, лувар я,
Куьн гьар йикъан зи шадвал я сувар я,
Куьн акваз зун гьамиша бахтавар я. 
Зав кьуьзуьвал агуд мийир, рухваяр !