ХьайитIа
ЦIийи свас хьиз иер я тар,
Цуьквер алай хел хьайитIа.
ХапIадин дад артух жеда,
Адак кьадар кьел хьайитIа.
МикIли кIамни Самбур жеда,
Марфадикай сел хьайитIа.
Къени кIвалел абур къведа,
Ниси авай цел хьайитIа.
Камаллудай кьада шаксуз,
Касдихъ рехи цIвел хьайитIа.
Къваз тавуна фида вилик,
Лашар хадай пел хьайитIа.
Гъуьрчехъандиз жив кIан жеда,
Адал къуьрен гел хьайитIа.
Рагар чIурна вацI элкъуьрда,
Халкь кIватI хьана мел хьайитIа.
Мейитдихъни мешреб жеда,
Гьайиф галай шел хьайитIа.
Дуьнья мичIи сур жеда заз,
Вун захъ галаз хъел хьайитIа.
© Copyright: Сейфудин Шахпазов, 2019
Свидетельство о публикации №119092605186
Свидетельство о публикации №119092605186
Рецензии