Дидедкай

Вилерай физ накъвар,вахъ вил,диде, зи хьана,
Куьгьне шикил кьуна , зун ви сурал атана.
Вучиз вун икьван фад аялрикай къакъатна,
Ширин диде зи чан , зи рик1 тек вахъ акъатна.

Акьалайла вилер вун вилеркай карагда ,
Валай авач иер , вал гьамиша дамахда.
Дидедин пак гъилер ракъинилай чими я,
Вун галачиз , диде,  чи к1вал гила эч1и я .


Экуьнахъ фад къарагъиз мектебдиз рекье твадай,
Темен гуз, п1узар хъуьрез , шадвал на рик1е твадай.
Йикъар физ алатзавай , яваш яваш ч1ехи жез.
Гъавурда акьан тийиз , гаф лагьайла дили жез.

Ик1  адет хьайи юкъуз гъурбатдиз рекье гьатна,
К1валахиз фид лугьуз , яваш гьа геле гьатна.
Вуна гардан кьуна , теменар гуз акъвазнай ,
Вилерик шелни кваз, сад яз ,ажуз акъвазнай.

Гьак1 шегьердиз фена , ваз зенгер ийидачир ,
Вакай хабар кьадай   декьикьа жегъидачир.
Амма вун дак1ард патав , рекьерал вил алаз,
Сабур гуз ацукьнавай , гьерекатна акваз к1анз.

Зун хуьруьз хкведачир, вахт заз авач лугьуз,
Ви рик1 пашман хьана зун хквезач лугьуз.
Са юкъуз хабар хьана , вилер хьана мич1и ,
Кучудна куьтягьна вун , ялгъуз туна вири.

Гила къванцин кьилихъ ,диде зун ацукьнава.
Вил хьанва сесинихъ ви, бахтсуз яз  амукьнава.
Ви фад къадир хьанач, сурал цуьквер гъана,
Къакъудна вилерин экв , рик1ел зи хер хьана.