(йиIий илли)
Сиха догаIа гIожа Тийрк,
Ареш энжи чувхаеш,
ГIоза уйлаш хьулаеш,
Безаманна кIийле еш.
Хьийдда доагIа зовне Тийрк,
Ший дорхалах йоаккхо еш,
ТалгIеш бирса лестаеш,
Бердий бовхьаш легадеш.
(ТIехьа оалар)
Тийрк, Тийрк, гIожа Тийрк!
Со хьога мамогга кхайк.
Тийрк, Тийрк, бирса Тийрк!
ХIана дац хьо соца дика?
Iа сога ладувгIа, Тийрк.
Сай бала аз кодабу:
Сай безам аз кхайкабу,
Хьа дозалах лерхIам бу.
Iа сона гIо де, ва Тийрк.
Са дег чура цIи йоае,
Са гIайгIа дIакодае,
Са безаман атто е.
(ТIехьа оалар)
Тийрк, Тийрк, гIожа Тийрк!
Со хьога мамогга кхайк.
Тийрк, Тийрк, бирса Тийрк!
ХIана дац хьо соца дика?
Тийрк, Тийрк, гIожа Тийрк!
Со хьога мамогга кхайк.
Тийрк, Тийрк, бирса Тийрк!
Дех аз, хила соца дика.
4-6.09.19.
Тийрка йисте
© Copyright: Аслан Куазо Ингушетия, 2019
Свидетельство о публикации №119090605492
Свидетельство о публикации №119090605492
Рецензии