Вахан дерт

 
Чанда т1ал аваз,вуна садазни чирначир,
Яраб азардикай вазни хабар авачир?
Гъуьлни,къазанмишиз,акъатнавай лап яргъаз,
Туькьуьл тел агакьайла,ам мукьвал хьаначир.

Духтурханадиз бубади тадиз тухвана,
Агъзур жуьре агъур хиялри рикI чухвана.
Нурлу вилер ивидин накъварив ацIана,
Са легьзеда багърийрин ширин чанар  цIрана.

Садакайни вахан дердиниз хьанач чара,
Эхиз тежедай тIал гьатна рикIера пара,
КIеве авай вах заз тадиз акваз кIан хьана,
Гьасятда кьве кIвачикай кьве залан къван хьана.

Я фейи дидедизни ахкунач бала чан,
Ахгакьнай адав анжах сед мусибатдин ван:
«Амач бала,кана бала,сабур ая на,
Къияматдин мич\и югъ я, рикI кIевиз яхъ на».

БарбатIна чаз экуь дуьнья чIулав хабарди,
Вилер шез,пIузаррал хер акъудна къабарди,
Вучиз икьван фад, вах вахчуна вун Аллагьди?
Чав гьамиша ширин сесиналди  рахайди?

Къанлу гапур акIурна ажалди рикIера,
Ч1улав яс гьатна хьи мукьвабурун вилера.
Вун амачир уьмуьр гила квез я,азиз вах?
Я чан Ребби,зунни зи вахан патав хутах.

Веледрин хуш сесерихъ бес тушни вун цIигел?
ФизватIани йисар вун ала даим рикIел.
Жаван кьве хвани цуьк хьтин руш етим туна,
Вучиз икьван фад на сурукай ваз кIвал кьуна?

Кьве стха Шагьни Шалбуз дагълар я вахарин,
Пуд вахни пуд цуьк я уьмуьрдин чиг гатфарин.
Чи чIехи вах,дидени тир вун чаз, куьмекни,
КIанзамач вах амачир дуьньяни,девлетни.

Вахан сивеллай мили хъвер хтайла рикIел,
Акьалтзава хьи вилерал куз-куз накъвад сел.
Мич1и я чаз гила дуьнья,йикъар гуьлуьшан,
Ви багьа т1вар чи мецел амукьда гьамиша.

Диде-бубадиз тир сифте акур экв-велед,
На туна рикIера акъат тийир еке дерт.
Хур гатаз туна рекьел,шел алаз вилерал,
Багърийри тухудайла вун,хкажна къуьнерал.

Мукьвал-мукьвал жезва, ширин, ви сурал мугьман,
Чун атайла,къарагъ,я вах,са-кьве гаф рахан.
Мурад - Аллагьди ваз кьисметрай женнет-макан,
Вун ахкунихъ чун дарих я,вах,чан эрзиман.

Чи рикIера куьтягь тежер дерт туна, зи вах.
Чи беденра сагъ тежедай хер туна, зи вах.
Ви сурухъ галай къван гила чаз хьанва,гьелбет,
Сирдаш арачи,вахъ галаз рахадай хелвет.

***

Хьанайт1а элхкъуьрдай за кьулухъди вахт,
Са къад сан,ахкун паталди ч1ехи вах.
Вунни за тухудай кьуна хъуьч1уькай,
Куьз я зи жегьилвал-вун галачир,бахт?