Дагъларин Шагь-Агьмед буба!

Къацу ч1урар, генг яйлахар,
Гьамга цин к1амар,булахар
Мугъандин мублагь къишлахар,
Аламай ви къимет, буба!

Акунач ваз ч1авар, къугъваз,
Аялзамаз зегьмет ч1угваз,
Жавабдарвал хиве аваз,
Къазанмишай гьуьрмет, буба!

Дявед йисар, четинвилер,
Хзан хуьдай рекьер-хуьлер,
Жагъуриз гьар мумкинвилер,
К1ват1на вуна рябет, буба!


Гьар камуна вун тир зирек,
Тухумдин кьил,арха куьмек,
Майишатдин даях- дестек,
Невсиниз гай тербет, буба!

Гатуз Ухул,хъуьт1уьз Мугъан
Муьт1уьгъ тир ваз дагъни аран,
Гъилеваз лаш верхи таран,
К1ват1ай кас я суьрсет буба!

Кашар мекьер алудна на,
Хъуьт1ер гатар акъудна на,
Хуьруьв девлет агудна на,
Зурба я ви зегьмет,буба!

Гуьгьуьлар ви жедай гумрагь,
Хуьруьнвийрин далу, панагь,
Лугьудай ваз «Дагъларин шагь!»
Багьа я ви суьрет, буба!

Устадвилин магьир авай,
Инсанвилин къадир авай,
Дерин фагьум-фикир авай,
Чи хиялрин гуьмбет буба!

Несилриз вун чешне хьана,
Дуьз адетрин чешме хьана,
Ви гьар са кар сечме хьана,
Вун чи ирсни девлет, буба!

Къвез алатда йисар вахтар,
Тарихар жез къатар-къатар.
Амукьда ви насигьатар,
Чи камаллу Агьмед буба!

Тамилади,буба ви ц1ир,
Давамзавай ви рехъ-жигъир,
Туьк1уьрай ваз къе и шиир,
Т1алабзава женнет, буба!