Яргъара чи аватIан гел,
Гьамиша чун я вахъ цIигел,
"Камбар булах", "ЧIехи кьвечIел",
Зи руьгьдин дарман Ухулар,
Зи хайи ватан Ухулар !
Припев:
Ухулар, Ухулар,
Мягькем я куь дувулар.
Къенибур я магьсулар :
Рушар я куь жейранар,
Якъутарни мержанар.
Дуьнья авур гьейранар,
Рухваяр пагьливанар
Ястин чIурар, дуьдгъвер мичер,
Килигналди тух жеч вилер.
«Бубадин цIар», « ВацIун гъенер».
Я вахъ эрзиман Ухулар,
Зи хайи ватан Ухулар !
Халкь сад хьана чIугваз зегьмет,
Арадаваз хатур-гьуьрмет.
Чи садвал тир чIехи девлет,
Виридаз масан Ухулар,
Зи хайи ватан Ухулар !
Ви рухвайрин гала вахъ гъил,
Вун абуру тадач сефил,
Бубайрин гел аламай чил,
Хкведа вал чан Ухулар,
Зи хайи ватан Ухулар !
Гъиле чарни къелем аваз,
ТукIуьрзава чIалар за ваз,
«Руш аватай раг» рикIеваз.
РикIин эрзиман Ухулар,
Зи хайи ватан Ухулар !
Ухулар
© Copyright: Тамила Хуршидова Салманова, 2019
Свидетельство о публикации №119081906223
Свидетельство о публикации №119081906223
Рецензии