Вил вегьена килигайла чуьллериз,
Аквазвайди иервал я вилериз.
Дагъдин синел рамагарни,суьруьяр,
Чубанарни,ягъиз кфил, манияр.
Къацу багълар гзаф гуьрчег аквазва,
Таран хилел билбил шаддиз рахазва.
Къайи булах шуршурдин ван ацалтна,
Авахьзава,гъвечlи хвал каф акьалтна.
Гьамга булах,гьикьван хуш я вун халкьдиз,
Хуьруьз хтай гьар сад къвед ваз мугьмандиз.
Ви илгьамдин чешмени къе гурлу я,
Къайи булах,вун чи халкьдиз нурлу я.
Къацу махпур экlя хьанва чилерал,
Гуьрчегвиляй кьаз кlан я вун гъилерал.
Гьар са касди кьил виневаз кlвалахда,
Лезги чилел за датlана дамахда!
Тlебиатдин иервал
© Copyright: Марьям Алискерова, 2019
Свидетельство о публикации №119062001137
Свидетельство о публикации №119062001137
Рецензии
