Пара хьанва искендарар...

За ина словарда жагъун тувуна,кьве нугъатдин гаф тунава:къагъай(къагъун)-дуьнья къагъана-весь мир завоевал;тlакlара-кьин гун(наставлять)...куьне вуч лугьуда-зи тахсир гъил къачу жедайди ян,тушни?))

Риваятда лугьузвалда:карч хьана
Эскендарал-дуьнья къагъай паччагьдал.
Гьар сефер кьил твай дерлекдин кьам яна-
Кас тадачир ада и сир ачухдай.

Акl хьаналда,мергьамет гвай чlавара,
Адаз язух атана са дерлекдин.
"Сир ахъаймир,"-лугьуз,гана тlакlара:
И сир ада суруз тухун герек тир.

Югъ акъатна,гьяфте хьана,фена варз,
Таъсирдакай хкатнач ам акурдан.
Эхи тежез амукьна,сир къеневаз,
Битав тандал акъатначни агъургъан!

Эхирни ам фена яргъал са вирел,
Кутуна сив цик,ахъайна вичин сир.
Гьасятни хтана ам вич-вичел,
Азад хьана,гила гзаф кьезил тир.

Са йисалай са чубанди вирин а,
Къерехдилай са тlвал къамиш атlана.
Алагъарна,ада писпlи туькуьрна-
Ягъадайла,тек са мани атана...

"Чидани квез Эскендарал карч алайд?"-
Илиг тийиз ягъаналда писпlиди.
Инсандивай лугьуз тахьай,кичlелай,
Икl писпlиди ахъайна сир кесибдин...

Эскендаран сир виридаз чир хьана,
Амма ада жаза ганач дерлекдиз:
Чlурнавачир ада икьрар,сир хана,
Паччагьдизни вичин гаф хуьн герек тир...

...Зунни ава гила гьаман дерлек хьиз,
Лугьуз жезвач сирер,жуван къеневай...
Писпlи ягъун гила низ я герекди?
Пара хьанва эскендарар-кьам ядай...