Алатзавач рик1елай...

Зун гимишдин квар къуьневаз,
Чи булахдал физвай ч1авуз,
Мулдин цуькверни гъилеваз
Атанай вун заз савкьват гуз.

Кьил агъузна за ви гъиляй
Мулдин цуьквер къачунай,
Гаф акъудиз тежез сивяй,
Квар булахдик кутунай.

Хуьруьн рушан лацу чиниз
А саягъ яр къекъифнай,
На лугьун бубуяр ник1из
Гатфарихъди илифнай.

Чун къужахда авай алем,
Чархачи хьиз, элкъвезвай.
Зун, Эсли тир, вуни Керем -
Муьгъ рик1ерлай вегьезвай.

Ик1 сад лагьай к1анивили
Рик1ера муг авунай,
А гьиссерин ярш - к1унч1 гъвеч1и
Заз дуьнъядай акунай…

Булах машгъул тир к1валахиз,
Чун чав миллиз раханай.
Квар, чарчар хьиз, яд алахьиз
Сиви-сивди ац1анвай…

Вуна, цикай хкудна квар,
Мукъаятдив вахканай.
-Вуч иер я! - вунни ви т1вар, -
Бахтавар яз лагьанай…

Икьван ч1авал заз чин тийир,
Гьиссер гьикьван чими тир -
Мулдцуькверин милли атир,
К1анивал хьиз, верц1и тир.

Гьадлай кьулухъ къизилгуьлер
За къахчунай рекьелай,
Гьа вахтунин мулдин цуьквер
Алатзавач рик1елай...