Cт1ал Сулейман

Етимвал кьатIана  лап аялзамаз.
Жегьилвал акъудна  азабрик галаз,
Амма чешне гана ада  виридаз,
Халкьарин хушбахтвал кьуна  эрзиман,-
Лезгидин дамах я СтIал Сулейман!
 
Адаз гьич  я кIелиз,  кхьиз чидачир,
Ам мектеб такунвай  акьулбалугъ  тир!
Сивяй -сивиз фена   лагьай  гьар шиир…
Бес ихьтин фагьумрал жедачни  гьейран-
Лезгидин дамах я СтIал Сулейман!
 
Фикирар хци яз, кьатIунар дерин,
Къайгъуда амукьна элдин дердерин,
Гелер акваз ама фейи рекьерин,
А викIегьвилерал   шагьид я Кьулан,
Лезгидин дамах я СтIал Сулейман!

 
Девирдин чIанавал  кьаз цIарара  тваз
Дуьзвилин, гьахъвилин тарсар  гана чаз,
«Къад  лагьай асирдин Гомер» тIвар алаз,
Тарихда гьатунал  машгьурна  ватан-
Лезгидин дамах я СтIал Сулейман!

Шаирар рекьидач ,халкьдиз кIани тир,
Им тушни гьакъикъат, мегер яни сир?
Эсерар   кIунчIар я, цуькверин атир
Амукьда рикIера,  хьана гуьлуьшан,-
Лезгидин дамах я  СтIал Сулейман!

Фена ам вичелай гевгьерар  туна,
Сенятди шумудак лувар кутуна.
Зани а  булахдай илгьам къачуна
Лугьузва,вине кьаз хайи эл,макан:
Лезгидин дамах я СтIал Сулейман!