А микрофон це Эйвазаз...

И микрофон хчу завай,
Ам алугна кун тавурай.
Икьван ийер са межлисдиз,
Зи тlалдикай гъун тавурай.
Эйваз Гуьлалийрин

Це Эйвазаз а микрофон,
Шаир рахурай.
Аквада чаз дидед ханва
Гьихтин рухаяр!

Рикlин гафар булах хьана,
Эфирдиз фирай.
Лугьуз ифей нефесдалди,
Чи руьгь ифиррай.

Рикlин цlелхем шиирда тваз,
Ялав куькlуьррай.
Чlал,чил лугьуз канвай рикlяй,
Чаз нур цикlиррай!

Хайи чlалан атир чиррай,
Гъафил сивериз.
Беледрай чун ватан кlан хьун,
А пак сирериз.

Шагьдин кукlвал элкъвезвай лекь,
Тесниф авурай.
Чун лекьер тирд рикlел хкиз,
Кудрай ахварай.

Лугьурай мад:"Куь рикl сагърай,
Гвадармир ватан!
Чи дидеяр хъел жедачни
Кьуртlа чlал патан?!"

Чlал течидай лезги акваз,
Атlучни кьарай-
Це микрофон,хкажрай къуй,
Къеневай гьарай!

Микрофонни адан гъиле
Хупl регьят жеда.
Авай гаф я-зардин къадир
Зергердиз чида!

Югъди,йифди гаф лугьункай,
Галатдач ама.
Чун а гафар ийиз тежен
Япалай,амма.

Це микрофон фад Эйвазаз,
Курай ифена!
Яб це!Мана веревирда
Ахпа...хъфена!