Къалажух зи, хайи диге, Кlелетар...

Са кьил кьере,са кьил дагъдин кикелла,
Кlвалер ава,тик рагарин кьилелла.
Гад серин жез,кьуьд къвезвайд я кlевела-
Алукlа,дуст,мугьман къверла,куьлуьтар,
Къалажух зи,хайи диге,Кlелетар.

Кьве вацl-кьве гъил я,къужахда кьуна вун,
Гъвечlи вацlни Чlехи вацlун кьула вун.
Икl ярх хьана кьве дередин кlула вун
Ялар ягъиз,къачуз ятlа регьятвал-
Къалажух зи,хайи диге,Кlелетар?!

Рикlелламач пара шеер,алатай,
Вахтар я зи яш-уьмуьрдин,галатай.
Амма гьар са ви кlевера акъатай
Легьзе,гъиз я хуш хиялрин кlеретар...
Къалажух зи,хайи диге,Кlелетар.

Жив аватна,экуьналай чун квахьдай,
Гъелераллаз Алид пеляй авахьдай.
Алукьдай чун,къахрагъдай чун,авагъдай,
Аяз акьаз,гьатдай сиве,пеле тlал,
Къалажух зи,хайи диге,Кlелетар.

Тlамуз фидай,кал-гамишдиз пешердай,
Басма кудай,рук акъуддай мишердай.
Гатаз тай-туш,мугьман атай шегьердай...
Аялар тир,айибмир,ви веледар-
Къалажух зи,хайи диге,Кlелетар.

Кьилихъ кьакьан сувар я ви,яйлах я,
Гьар кlама са сас тlакьурдай булах я.
Дагъдин яцран,жейранарин сурагъдал
Къведай немес,ингилисни белед я-
Къалажух зи,хайи диге,Кlелетар.

Давутан пlир,Ширвандере,Къавгъадар,
Сенгер-кlеле,ана хьайи къавгъаяр,
Гулле ягъай,стхад вичин стхадал-
Пара хьана дуьнед ихьтин гъалатlар,
Къалажух зи,хайи диге,Кlелетар.

Муллаъали,Балтакъая,Къупалдагъ,
Атяйлах са жавагьир-куь тупlалдал.
Иви кватиз гъуьрчехъандин чувалдай-
Фена кlандай гьичдиз адан зегьметар,
Къалажух зи,хайи диге,Кlелетар.

Лугьун кьве гаф лацугардан рушаркай,
Назарин кlватl,ийер инжи къушаркай.
Зани зи рикl са жейрандиз бушарнай...
Варз алай йиф...жагъур тежез хелветар...
Къалажух зи,хайи диге,Кlелетар.

Къариблухдиз ягъамир на зи гафар,
Вуч жен-садра кьисмет хъижен ви гатфар.
Сачунилай цири галай нез афар...
Сурар кlватlин,камбар кутан,кьеле тlван-
Къалажух зи,хайи диге,Кlелетар.

Ахъайиз жен кьилел атай краркай,
Рикlе авай херерикай,тlураркай.
Амайбуркай,фейибурин-сураркай...
На заз белки хгун эхир билетар-
Къалажух зи,хайи диге,Кlелетар...