Бурж

"Бурж вугун - им саваб  кар я,
Чир хьайитlа къачурдаз,
Чир тахьайтlа рикlиз тlар я,
Дугъри хесет кьац1урда.

Атай касдин сефилдаказ,
На рик1ивай язухда:
Акурлай ам гъафилдаказ,
Сундухди рак ачухда.

Куьгьне мах я къенин хабар,
Тагай зат1дихъ гелкъвемир.
Хийир ят1а, ийин тикрар,
Гайидалай элкъвемир.

Бурж къачурда макьамарда-
Зигьин фида вугайдан.
Ви гьалални гьарамарда,
Намус хуьдач тухвайда.

Инсафдин пай атlай ламра
Уьмуьр къуда шандакьиз.
Чидай зат1 туш уьзуькъара,
Гьар камунал вич гьакьиз.

"Зални гьалтнай са ихьтин лам,
Бармак алай, зурба тир.
Гафар лугьуз хъсан, тlарам,
Акьулдиз са супа тир",-

Икl лагьайла кавал галай,
Яшар хьанвай Алиди,
Хабар кьуна патал алай,
Адавай фад Велиди:

"Къалаблух гва къе ваг, Али,
Нихъ галаз ви къал хьана?
Белки хьанва вун азарли,
Вуч себеб яз т1ал хьана?"

" Вуч лугьуда за ваз, Вели,
Са йис идлай виликди
Атанай са кепейугъли,
Чармат1ар квай кьиликни

Накъварни къвез вилелай физ
Чилел алай, авахьиз.
Дерт хьана ам акур рик1из,
Ийир-тийир квахьиз.

Къуй ви гьалдиз дарман хьурай-
Регьимвал чи девлет я.
Жувандан кьил кьакьан хьурай-
Куьмек авун адет я.

Бурж къачуна, фу-яд хъвана,
Мугьман к1вализ ахладна.
Гатфарикайни гад хьана-
Мадни вахтар алатна.

Са къуз, цавай аватай хьиз,
"Фенвач ви бурж рик1елай",-
Акъатна ам, ниятай хьиз,
Хъвер алахьиз сивелай.

Са легьзедлай, тадидаказ
Хъфена ам атайвал.
Са вахт фенач, ракlар гатаз,
Лугьун за квез авайвал,

Бурж т1алабиз мад са кесиб
К1валин кьулал атанай,
Гъилемай пул, тахьай сагьиб,
Бурж к1анидав вугана.

Ингье са-сад къвез хъфена,
Татайбур кьвед-пуд хьана,
Садбурни лап шез хъфена,
Чидач ин шумуд хьанайт1.

Хьаначни вуч уьзуькъара:
Гил жувни муьгьтеж хьана:
"Авачирди гьинай гъида?
Я стха, вун геж хьана!"

Варзни хъвериз, ягьанатдив,
Цавун кьулаз акъатнай.
К1евиз кьуна хажалатди,
Зун жувакай хкатна.

Хабар кьуна эхирдихъай,
Им мад аламат хьана:
" Вуч к1ан я квез фагъирдивай,
Им нин зарафат хьана?"

Гьа ик1а зун жузаз авай,
Пул к1анибур атайла.
Фагъир бегьем зурзаз авай,
Зун зурар гваз рахайла.

Эхир ада, есирди хьиз,
Ялавди сик1 кайивал,
Кич1ез-кич1ез, фагъирди хьиз,
Ахъайна кар хьайивал.

"Гъил къачу на залай, Али,-
Регъуьдаказ лагьана,-
Муса физвай гьарда к1вализ,
К1вачик рак1ар гатана.

Кефсуз яз зун ацукьнавай
Айванд пип1е туьнбекиз,
Бедендихъ мекь галукьнавай.
И арада,са к1ек хьиз,

Сив алахьна, чапак хьтин,
Муса винел атана.
Ц1алц1амар гуз, барц1ак хьтин,
Каш-мякь ийиз лагьана:

"Са чувал пул сегьер-сегьер
Вахгана за Алидив.
Ана ава гьарай-эвер:
Пайзава пул Алиди".

Гьа и к1валах аламат яз,
Ви кьилив зун атанва.
Фикирнай за - ягьанат я.
Гил за и кар кьат1анва.

–Хъсанвал авурт1а ламраз,
Адан къадир чир жедач.
Гатайтlани на а къалмаз,
Адакай къатир жедач".