Ва, гIалгIай!

(мукъа стих)

Даьла вувц вай –
Даьлах кIезига кхер вай!
Дин бувц вай –
Динах а таьрг ю вай дукхагIча хьале.

Маьждигаш дизад вай –
Амма царчура хьехам, цун дозал
Царчу дут вайх дукхачара,
ТIара кхосса барзкъ санна!

Даьла Iехо гIертараш дукаха ба вайца,
Из – Iехалац.

Нийсхо хила еза ях вай массанахьа –
Воашта эшачоа из хьалха тувс вай,
Кхычоа – харцо я вайга совленца.
Бакъдар дувца деза! – ях вай,
ХIета, бакъдолчун духь дайнад…

Машар бувц вай воайла –
Цох, ма дарраш, уд вай.
Барт-цхьоагIо дувц вай –
ХIаранена ловчун тIа нийсде гIерт из.
Машар – иштта кхоллац.
Барт а – цу ларда тIа чIоагIлац!

Къам дувц вай –
Къаман «соа» чIоагIйолийтац вай воаша.
Мохк бувц вай –
Мехка дизза дай хила денал-яхь тоъац вайга воашка.
Республика ях вай –
Вай меца хиларо, вай эсалено, сутарлено хьахулийтац из
Хила ма еззара –
Къоалашцеи, куташцеи хьаоттац паччахьалкхе.

ГIалгIай эздел дувц вай –
Цун лар хоадае гарга да вай:
Вайга хIанза диса долаш дар,
ДукхагIча даькъе,
Духхьала моттийтар мара дац.

Ди-денгара воаш доадеш хьадоагIа вай –
Къон-къонагIа вар, мег-мегаш вар…
Воаш а доадайт вай иштта –
Зехьа, Iовдалца, волца…
Эзар шерашкара доагIа вай къаман фу
хоададеча новкъа тайжжа долхаш а да вай –
Дечунна уйла йоацаш, лелочун зем боацаш,
хулаш латтачун сагото йоацаш –
Харцонаш кот йоахаш, цаэшар тIаувзаш,
Гаьннарча мехкара хийрача наьха Iовдалаш
воашка хьаийдеш,
Царна тIехьадувлаш,
воаш Iехадайташ, воаш хIалакдайташ –
Ахча-рузкъа – мел бIехадар аьнна –
башхало ца еш.

Дийнача цхьан сага мах
бац доаккхача Дуненчура рузкъа –
Къона, ховхачун бар-м – хIета а.

Къона саг – къаман кхоане,
дIахо даха, деба дезача ноахалена духьиг –
из дIавалар – цун ноахал дIадалар,
Къаман дакъа дIадалар.

Иштта,
хургдола ах къам
дIадаьннад вайх лоаццача хана –
Кагирхой ди-денга боврца, боабарца, боабайтарца…

ТIаккха, гIалгIай, фу мах ба
вай лелочунна,
вай кхесточунна?

Фу хила деза вайгIа тIаккха, – вайна, тIаккха?
Сенга долхаш да вай?
Мича кхача уйла йолаш да вай?!

Апрель 2009 шу.