Мадо, Дадо оал цох хьесташ,
Маддан – даде, нане оал,
Ва, Мадока, оал хьаехаш –
Шеввар цунна гонахь воал.
Вешта, цун, ма дарра аьлча,
Мадина яхаш я цIи.
Хийла къамаьлде из яьлча,
Хоза я багара Iи.
Я из школе деша ухаш –
Дешарах из дика кхет,
ЦIагIа хул ший книжкаш дешаш,
Язду цIена наьна метта.
Хул ший ловзоргех а ловзаш –
Ужаш цунга бе-бе да,
ЧIоагIа царца самукъдувлаш,
ЦIагIа, коа тIа хьувзаш я.
Ма мотталда шоана, бераш,
Из кхы хIама хьадеш яц…
Я, даьра, из-м цIагIа хьожаш –
Чухьа цIанал ца еш Iац.
Яц из баге юхаетташ,
Ийрча оамал цунца яц,
Мухаш ухаш, цIувзаш, елхаш –
Во дар цунца холуш дац.
Иштта я Мадина яхаш.
Мадо, Дадо цунах оал,
Мадока а оал цох хьесташ –
Из массарна езаш йоал.
Январь, 20I3 шу.
Мадо
© Copyright: Аслан Куазо Ингушетия, 2019
Свидетельство о публикации №119030305559
Свидетельство о публикации №119030305559
Рецензии