ЙиIиг Мовлатхан

Алал, бераш,
Йовзий шоана
ЙиIиг Мовлатхан?
Безам ба са
Бакъдар шоана,
Лечкъа ца деш, ала.

Сатем болаш
Я из йиIиг,
ЭгIаз ухаш яц.
Новкъосташца
Барта йолаш,
Царца мара Iац.

Даьна, нанна
Илеш доахаш
Гонахьа из кхест.
Даде, нане,
Дукха езаш,
Безамца из хьест.

Меттара Iурра
Хьал а гIетте,
Кулгаш дилле ший,
Сихха хьовз из,
Нув хьаийций,
ЦIагIа лостам бий.

Хlама йиий,
ПхьегIа яьккхий,
Шийга дулур дий,
Коа тIа а;ра йоал
Из тIаккха,
Чухье цIанайий.

Ший мелла йолча –
Кегий-мегий –
Дуккхача теникий,
Нанас санна,
Хьал-Iо нийсйий,
Йоал из Iунал дий.

Ловзоргаша,
Кийча я из,
Эшаш хуле ший,
Нешарашца*
Юкъа декъа,
Царна лоIам бий.

Мухаш ухаш
Яц из йиIиг,
Аьннар цадеш яц,
Даьна, нанна
Духьал ювлаш,
Харцо лелош яц.

ТIаккха, бераш,
Яйзарий шоана
ЙиIиг Мовлатхан?
Безам бий шун
Цунна тара
Хила массе хана?

Декабрь 1986 шу.
Шолж-гIала.

------------
*Неш (гIалгI.) – подруга (нешараш – подруги).