Ви тандин...

Заз чидач вирида кьатlанватlа...са реальны уьмуьрда ваъ,ина-виртуальны аламдани ахьтин "дустар" ава хьи,"личкадиз" "дуствилин" месажар кхьиз,ви дуст ви виляй вегьиз кlанда-амма язух дустиниз хабарни жедач.Заз чида хьи,ихьтин "дустари" закайни зи гьа дустариз авачир гафар кхьида.Гьавиляй,зун алахъда жуван рикlиз яб гуз...

Накьан дуст айгьамдал рахазва зав къе,
Фикириз ама зун:гьикl...яраб...белке...
Вуч къвезва ви гъилиз,лагь,я хва тlекьей?
Гьикьанни чlулав рикl жезни инсандиз-
Гьикьван туькьуьлвилер вуч я ви тандин?

Жезвач кьил акъудиз паб ян,итим ян,
Икl фейтlа ви эхир,валлагь,четин я.
Куьтягь тlун фитнеяр,итlи-битlияр,
Гьикьван бес чlулав рикl жедан инсандиз-
Гьикьван туькьуьлвилер вуч я ви тандин?

Чарадкай чарадаз лугьуз гагьул туш,
Маса гудай затl туш къачуз,акьул-туш.
Хьанайтlа тlимил кьван гьахъ вун макъул-туш!
Гьикьванни чlулав рикl жезни инсандиз-
Гьикьван туькьуьлвилер вуч я ви тандин?

Дустунин шад хьуни гевил кьаз я ви,
Масадан агалкьун виле цаз я ви.
Дамардай физвайди-агъу кваз иви,
Гьикьван бес чlулав рикl жедан инсандиз-
Гьич азаб гудачни ада ви чандиз?

Дустуниз дустункай чугъулариз я,
Инсанрин гьиссерив къугъунариз я,
Сецихъ галаз якни чукlулариз я,
Гьикьванни чlулав рикl жедан инсандиз-
Авайкьван туькьуьлвал вуч я ви тандиз?

Бес хьурай ви экъвез араяр ягъун,
Жуваз са хийир квай машгъулат жагъур.
Тухудайди са юкl кафан я,агъун...
Гьикьван чlулав рикlер тахьуй ИНСАНдиз-
Залан я ам тандиз,залан я чандиз!
06.02.19 г.