Лекьрен шараг

Нисинин вахт, ц1ай аватна
Къван ргазвай дагъди хурал,
К1елер вири фирикъатна
Ацукьнавай чубан аял.

Шур-шурзавай булахдин яд
Авахьзавай сериндаказ,
Физва аял ахварал фад,
Галатнавай, шириндаказ.

Серинарик ц1велин таран,
Тапасдал т1иш эцигна хьиз,
Ярх хьанавай гъвеч1и шараг,
Алид патав эгисна хьиз.

К1елерив гвай, к1елез ухшар
Аялдин п1уз юзаз авай;
Аквазавай адаз ахвар:
Шириндаказ рахаз авай...

Аквазва лекь, хана лувар,
Язухдаказ минетзавай:
-Зи баладиз хьанва зарар,
Сик1ре рум гуз къелетзава.

Япарани амаз сесер
Аватна ахварай куьруь;
Авач дагъда гьарай-эвер,
Архайин я гъвеч1и суьруь..

И арада гъвеч1и шараг
Кьил хкажна килигзава,
Гададизни атана шак,
Гъил чумахъдал эцигзава.

Виниз хьана, яваш-яваш
Кьведни физва раган к1аник,
Хатадин гьич са ван авач,
Рахазавай къушар назик.

Садлагьана, пис элуькьиз,
Цава кьуна гъвеч1и са тум,
Катна гъвеч1и шараг  виниз;
Аслан хьиз аквадай залум.

Теспача яз ялиз тадиз,
Али гагь-гагь алукьзава;
Белки са к1ел гъвеч1и, ажиз
Хъхар к1аник ацукьнама.

Акъатна фад рекьяй винел;
Акур ахвар гьакь хьана хьи.
Элиг ийиз чумахъ чилел,
Гададкай са лекь хьана хьи.

Дагъди кьакьан синел алай
Лекьре шараг, фагъир хьтин,
Ават хьана чилел алай,
Ярх хьана са есир хьтин.

Кич1 акатна, ажуздаказ
Хъхарив ам эгиснавай.
Са сик1ре лап ягьсуздаказ
Сарар вичин экъиснавай.

Тартадин ван галукьайла,
Ахкурдини са тум хьана.
Лекьре шараг амукьайт1а,
Жеда инал магьрум хьана.

Чара авач, вик1егь аял
Кьамуз чанта вегьена хьиз,
Лекьре шараг алаз кулал
Рагарикай физва виниз.

Мукъаятдиз, къванерикай
Куьмек акваз, четиндаказ,
Рагарин пис синерикай
Физва аял секиндаказ.

Галатнавай, ажуз хьана,
Аялдиз им са гуж хьана.
Эхир, винел агъуз хьана
Гъилер, к1вачерни буш хьана.

Эцигна хьиз муква шараг,
Ял аладриз ацукьна ам.
Акур ч1авуз экъуьч1ай раг,
Фикирд кьуна амукьна ам.

Гьик1 хъфирай виняй агъуз,
Хьайиди хьуй - саваб хьана,
Аял бегьем хьанва кефсуз-
Такур адаз азаб хьана.

Кич1 акатна юргъун хьайи,
Аял муква суст хьанава,
Шарагдизни юзун тийиз,
Алидикай дуст хьанава.

Лекьрез вичин муквал хтай,
Мугьман акур хъел атана;
Чир хъхьана чубан аял,
Лап мукьув синел атана.

Ч1урунди вич хьайит1ани,
Са к1ус кьванни акьул ава.
Ничхирди лап гъайит1ани,
Намусдихъни дувул ава.

Хуьре-к1вале акъатна къал,
Йифни хьана, чубан авач.
Гьиниз фида, гьинва аял;
Ацукьникай дарман авач.

К1ват хьана хуьр, физва вири
Ц1ай куьк1уьрна уркарни гваз.
Садав яргъи, садав куьри,
Йифен рехъ я, лашарни гваз.

Са кьадарниз акъатайла,
Киц1 элуькьдай ван атана.
Лап мукьварив акъатайла,
Гурц1улдал мад чан атана.

Гъвеч1и чубан вилив хуьз, ам
Амукьнавай дагъда йифиз.
Яргъи ийиз, экъисаз кьам
Килигзавай раган кьилиз.

Гьарай-эвэрди ван хьана
Ахварай аватна чубан.
Вичизни лап дак1ан хьана;
Вичин тегьер акур, залан.

Ц1илеривди куьмек гана,
Ахвудна фад аял к1аник:
-Ингье им ви эркек гада!
Эцигна ам бубад вилик.

Гурц1улни физ гьахьиз хуруз,
Инсан хьтин рахазавай,
Хвеши хьайи лап кьадарсуз,
Мез аватна къугъвазавай.

Лекьни цава элкъвез-элкъвез,
Разивилив килигзавай,
Хуьруьнбуру рахаз-хъуьрез,
Кьегьал гада тебрикзавай.