Уэ узигъусэщ

Аргуэру гуауэр къыдыхьащ ди пщ1ант1эм,
Аргуэру жьыбгъэ бзаджэр къыкъуэуащ.
Ажалыр тек1уэтауэ къыщыхъуами,
Гъунэгъуу зигъэпщк1уауэ къыщ1эк1ащ.

Мэ1эбэ си 1эхэр,къызэмыда1уэ,
Къалъыхъуэ анэ гуапэ с1эщ1эк1ар.
Къызэмыда1уэ си лъэр, сыныщ1опхъуэ,
Ауэ к1ыф1ыгъэм уэ усф1игъэпщк1уащ.

Сыгузэвауэ зызоплъыхь, укъызолъыхъуэ,
Си анэ дыщэ, сыт зыщ1эбгъэпщк1уар?
Къыхэк1ыт мы к1ыф1ыгъэм, зызгъэлъагъут,
Зеиншэу пщ1ант1эр сыт къыщ1эбгъэнар?

Къэшийт, си анэ, уи 1э щабэ ц1ык1ухэр,
Къытелъхьэ си гум, зэгуомыгъэуд.
Къызжы1эт псалъэ закъуэ, зыкъэзгъащ1эт,
Ажалым и мурадхэр зэпыуд.

,, Дапщэщ укъэк1уэжыну? ", - жы1и къызэупщ1ыт,
А упщ1эм и жэуапри си хьэзырщ:
Уэ сытым дежи узигъусэщ, си анэ,
Къыстеплъхьэу уи мыгугъэ уэ тезыр.

Уэ узигъусэщ жэщым сыгъуэлъыжми,
Нэхущым деж п1э лъапэм укъытесщ.
Пщ1ыжащ уэ гъусэ ди адэр, ухуэк1уэжри,
Уи къуэ гъэф1энри уибгъук1э къызбгъурытщ.

Умыгузавэ, мамэ, фызэгъусэ,
Уэ уи псэр зык1и умыгъэп1ейтей.
Мы дунеижьым къытена уи бынхэр
Ныпхуэк1уэжыхук1э уздэк1уа дунейм.