РикIе гьатнава

Гатфарин  юкъуз заз  экуьн кьилелай
Са тават акуна гуьлуьшан чIурал,
Вегьенвай хранвай  жакет  гъилелай,
Бубуйрин  иер  кIунчI  алкIурна хурал.

КьецIил квачIеривди таз ада  гелер
КIватIзавай гьевесдив жуьреба цуьквер,
ЦIвелерай  авахьиз чигедин селлер,
Баядар лугьузвай  чина аваз хъвер.

КIвачерин ван хьана,  кьил элкъуьрна захъ,-
Какахьна   жейран хьиз  гъуьрчехъан акур!
Белкини вилерал жезвачир чIалахъ,
И дагъдин яхада  масада акьур.

Вилер, гьикьван иер-булахар   хьтин!
ПIузарар юзазвай   седеф сарарал,
Ракъиниз ухшар тир нур гьатнавай чин,
Ша, ашукь жемир вун расу чIарарал!

Ийир-тийир хьана  гаф лугьуз тежез,
Гьатнавай суьгьуьрда -акатна зурзун…
Эхир мез ахъайна: мекьи жеда Квез!
Гайи жавабдилай мягьтел хьана зун:


Яргъара жезва зун  чи  ватандилай,
Яман  дарих хьанва хайи дигедихъ…
Хтанва макандиз- азиз чандилай,
ЦIигел я гьикьван зун сувун  чигедихъ!   

КичIевал авач заз, Ватан -чи лукьман,
Гъурбатда хьайила  даях я  ам чаз,
И цуьквер, и векьер -дердериз дарман,
КIани я заз хайи дагъларин аяз…


Уьмуьрдин легьзейрихъ  зар хьиз акатай,
Гатфарин йикъалай  йис  алатнава,
Цуькверин арадай цуьк хьиз акъатай
А тават  гила зи рикIе гьатнава…