Вучиз?
Вун я заз чирайди вахтарин къимет,
Гьиссерин верцIивал турди зи кьиле.
Вун я ванарайди - им я ви кьисмет,-
Сирнавиз гайиди бахтарин гьуьле.
Вавай заз чир хьана, тек сад рикIе тун
Уьмуьрдин чIехи са бахт хьиз кьабулун,
Ва тек гафунилай гъавурда акьун,
Тек килигунилай вири аян хьун.
Тек вун я лагьайди- гьайиф къведач чан-
Жуван уьмуьрдикай атIана ваз гун!
Тек са ваз хас я кьван кьуна масадан
Гъамар багърияр хьиз рикIив агудун.
Тек вун я гъавурда акьазвайди зи,
Тек ваз ахъайзава за руьгьдин сирер,
Тек вун я рикIин къен аквазвайди зи ,
Тек вуна гьисзава кар кьунвай хирер.
Вучиз за вахъ галаз гъам пайзаватIа,
Вучиз на зи руьгьда икI цIайзаватIа?
© Copyright: Билал Адилов, 2018
Свидетельство о публикации №118121005250
Свидетельство о публикации №118121005250
Рецензии
