Ахвара зун архайин тир береда,
Гугрумдин ван гьатна секин дереда.
Ц1айлапанди вичин гужлу гъилерив
Мумкин гузвач цава авам циферив.
Гимишди хьиз рап1-рап1 гузвай ст1алар,
Шийидар яз чизвай рик1ин хиялар,
Яваш-яваш зи пенжердив агатиз,
Алахъзава кузвай рик1ик акатиз.
Халикьди марф заз савкьат яз багъишна,
Туьхуьрна ц1ай, абукевсер илична.
Ви гьамгадкай даим хьана заз дарман,
Хайи чилиз бегьер гана авадан.
Марфадихъ авай зурба я къуватар,
Гуьжетдай вахъ галаз авач такьатар.
Берекат гуз кесибриз я марф дава ,
Нагьахъбуруз яракь я къваздай хура.
Марф
© Copyright: Джульета Омарова, 2018
Свидетельство о публикации №118112004350
Свидетельство о публикации №118112004350
Рецензии