Салам Самур! Акатна звал,
Ви кефияр бейгьал яни?
Марф къвайила акъудиз къал,
Бес и кlвалах гьалал яни.
Чара ийиз багъри миллет,
К1ан хьайида гузва къимет,
Чир тахьайла къадир, гьуьрмет,
Вун бат1улун амал яни?
Тийижирда вичин асул,
Чlаларин ахквазва дувул,
Гуьгьуьлар ви ийиз рагъул,
Вун вуч я, са къанал яни?.
Гьар садакай хьанва агъа
Чlалан кьилел язух, чагъа,
Кхьин хьанва лап къадагъа,
Им вуч я, къалмакъал яни?.
Жанавурд хам гьалчна винел,
Халкьар ийиз ава кьвечхел,
Амач лугьуз шк1уьд кьекьел,
Бес ик1 хьунухь - им гьал яни?
Салам Самур
© Copyright: Магомед Мирзоев Мирзой, 2018
Свидетельство о публикации №118111508252
Свидетельство о публикации №118111508252
Рецензии