Агь,къе заз зи яр акуна булахдал,
Са назлу нигар акуна булахдал,
Аламатдин кар акуна булахдал,
Алаз чlулав хал акуна бухахдал,
Кlанда хьи тикрар акуна булахдал.
Бахт ахъа яз,хьана къе и къени кар,
Са ажайиб,жуван рикlиз кlани кар,
Вичин къамат тlарам-тlарам хуьникай,
Килигункай садра вилин кlаникай-
Катна ихтияр акуна булахдал.
Квар къуьневаз,кьилни агъуз,фена ам,
Аста-аста лирли лугьуз фена ам,
Заз кьасусдай фикир тагуз фена ам,
Жейранди хьиз наз гуз,наз гуз фена ам,
Са мелек-дидар акуна булахдал.
Зи яр къвекъвей жигъиррини нур гана,
Булахдин цин журжурдай ван гур хьана.
Сив кьурана,зи ниткьияр чlур хьана,
Фена жуьрэт,ягъаз рикlи хур хьана,
Руьгьни тармар-акуна булахдал.
Суьгьуьрдакай фад хкатна гена жув,
Ярх тахьана,са жуьр кlвачел хвена жув,
Чира,Намик,адан мукьуз фена жув,
Мез ахъайна гужуналди,кьена жув-
Кутlунна икьрар акуна,булахдал.
***
© Copyright: Намик Фарзалиев, 2018
Свидетельство о публикации №118101109091
Свидетельство о публикации №118101109091
Рецензии