Уьмуьр, ахвар хьтин...

   
Мадни йиф,мичIи йиф, чаз такан тир йиф,
Азабри ийизва чандикай  кьекьиф…

Залум ялгъузвили гузва кичIерар,
Вуч хъсан,вун ава нур гуз мичIера.

Атанва къени вун мад зи хиялриз,
Мелгьям алтадзава хирерал чализ…

Дамарра, ивида  къекъвез ава вун,
Къаст яни суалриз  жавабар къачун?

Четин я зун патал чи гьалар кьатIун,
ГьикI хьана гьатнатIа и азабра чун…

Амма заз  аян тир  гьакъикъат ава,
Чизва дегишайди   зи руьгьдин гьава.

Вун тир заз ахварай шербет гайиди,
Вун тир зун ашкъидин къула кайиди!

И дердер, и гъамар лагьанач ваз за,-
На жува байихна руьгьдавай суза…

Заз  хъуьрез канзавай вири  чуьнуьхиз,
Алахъна вучиз вун хажалат михьиз?

Лагь вуч ният ава, вуч ятIа къарар,
Гьинай  атанай заз суьгьуьр квай чарар?

Са рикIи лагьанай, вуж я хьи ваз ам,
Вуна мукьвал гъимир яргъаравай  гъам.

Анжах ам  галачиз гьикI хьурай зи гьал-
Завай эхиз женни чаравилин тIал?

Амукьа хиялра, катмир вун закай,
КуькIуьра шагьвардив цIверекIдикай цIай !

Лугьузва  вуна заз хъвер галаз сивик:
ГалкIурна кьисметди  кьве кани тир   рикI !

Вун азад са лекь я,  герек туш накъвар,
Зи гьиссер сафбур я ,акатда вахъ гар!

Азизди ,каниди ,секин хьухь, секин,
Им гьа чи уьмуьр я,ви ахвар хьтин…
                12.09.2018.