1-сентябр

А югъ рикlеллама зи,къенинди хьиз,
Садлагьай сеферда мектебдиз фейи.
Са гьафте виликдай кьил-кlвач гьазуриз,
Алахънай зи диде,ял гун чин тийиз.

Са дефтерни къелем хъултухдик кьуна,
Фенай зун мектебдиз,аялрихъ галаз.
Убагьдин ракарал,зун рекье туна,
Диде акъвазнавай ферягьлудаказ.

Цlийи дустаривди зун таниш хьанай,
Садлагьай маллимдиз авунай икрам.
Тарсар куьтягь хьунмаз кlвализ хтанай,
Диде танурдаллай-фу чраз тир ам.

Зи кьил акунмазни эверна кьилив-
Танурдин цlайуни къекъирфнавай чин.
Са гьиле чими фу,зун-муькуь гъилив,
"Хтанан,чан,"-хура тунай,кьаз,вичин.

Лацу гъуьредавай дидед винелпад,
Фадин ни къвезавай чими гъиликай.
Куьз я,чиз тушир зун,икьван "кlанивал"-
Пагьливан хьанвайтlа яраб хцикай?

Пара вахтар фенва а чlавалай къе,
А сариз фад-фад я ийиз зун килиг.
Садан сентябр-мад гьатна рекье,
Гьар суна физва зун мектебдин вилик.

Виливай хуьзва за тарсар куьтягь хьун,
Бицlекар мус кlвализ элкъведа лугьуз.
Са цlверекl умудди кутазва зурзун...
Бицlекрин гуьгъуьнай физва зун...ялгъуз.

Хьахьзава аялар сад-сад ракариз,
Дидейри виливай хуьзава якъин.
Зани саки икьван вахтар тахьай хьиз,
Жефте алудзава лахъ-лахъ ракарин.

Гьасятни вил физва танур галайнихъ-
Ам хьайи чка гьич за какадарзан?!
Цlвена,хъипи накьв я гила амайди...
Хквезмач дидед ван:"Чан,вун хтанан?"...