Мон эзинь маря прыця бомбань увт...

Мон эзинь маря прыця бомбань увт,
Мон эзинь нее фрицэнь азарсь чачот,
Монь эзть кармавто: «Калмо эстеть чувт!»,
Эзть сезне рунгом кавто пильгсэ пачат.
Монь эйкакшокс эзимизь ёрто толс,
Икелень тетянь-авань эзизь машто…
Ансяк монгак стявтозян вейсэнь полкс,
Ды потсон сэредькс – теке пуля ташто.
Ды маряви, тюринь, тюринь монгак!
Маряви, пейсэ поринь ятонь кирьгат,
Монь велькссэяк лымбакстнесь верев флаг,
Ды идем пижнемадонть кургом чирьгадсь…
Ки содась – моданть лангсо ули ад
Ды идемевсесь минек ютксо эри?
Освенцим, Равенсбрюк ды Бухенвальд…
Тесэ пертьпельксэсь сэредькстэнть сеери.
Тесэ пильгало кевтне чевтеть, псить,
Сынь токныть, теке ансяк таргазь седейть.
Ды састо-састо прясо череть стить,
Маряви, рунгот явови киськедеть.
Ды эйзэть кундыть сядот, тёжат кедть –
Эйкакшонь кеднеть, прок тараднэть човат.
Ды маряви, прок тонь эйкакштне неть,
Ды тон сынст кисэ тоначискак соват.
Ансяк мекев а велявтови шкась,
Ды мейсэяк а витеви те кажось,
Секс минек туртов лия ки арась,
Кись вейке – тюремс тюрематнень каршо.