Пурьгинев-даволов минек шкась,
Лакиця морведекс чады кежесь.
Кодамо тонолсто сон кирвазсь?
Кодамо гуйваряс пезэ кекшезь?
Кие даволт кепси, теке паз,
Сонсь а сти масторонзо идицякс, –
«Пазтнэ» маштыть ванстомо эсь пряст,
Сынст киськетне а цидярдыть пицевкст.
Сынь а содыть, кода кери кшнись,
Зярдо вешкезь сови сывелентень.
Каня стяко теемстэнзэ шнызь?
Окойники чопавтизь верентень,
Теке навасть крёст лемдема ведьс,
Ансяк эйсэнзэ чопода виесь.
Кшнись, сон аволь ломантеме ледсь, –
Толозонзо эрямось лепиясь.
Ваинек пултыця кежень псис,
Ды потсонок кельмесь – теке мацтсо,
Мерят теемстэнек – «паронь кис» –
Ойменек полавтызь автоматсо.
Полавкс
© Copyright: Людмила Рябова Эрзя, 2018
Свидетельство о публикации №118082008016
Свидетельство о публикации №118082008016
Рецензии