Лишметь
веенсттнэ кевердить Моданть,
омбонсттнэ чиить вакссост ды пижнить:
«Верепаз, ков кевери те Модась?»
Жюль Ренар
Келя, састо, каворевть китне –
Синдьсак сявдиксэть, секень вант.
Моданть чаравтыть лия вийтне,
Ды а миненек сезнемс сант.
Ды а миненек кепсемс вармат,
Таргамс васов ветиця кить.
Пекстазь кенкшть ды копачазь вальмат
Таго минек кирдеме стить.
Ансяк стяко эйсэнек кардыть, –
Минь прок седейсэ чачозь пштикст.
Минек потсо алашат ардыть,
Идем лишметь – акирдевикст.
Менить ашкосто, прок полонсто, –
Истя уретне лексить кошт,
Зярдо лисить коморо потсто,
Зярдо локшотне теить општ…
Ды… менелесь пильгалот мади,
Чизэ панжи, прок цецяпря,
Зярдо варманть ёнксозо лади,
Сестэ куломс – сеяк вадря.
Ношкстат кополсо ойметь келес, –
Кургот керясы онкстень кшнись.
Ды прок отьмасто Пазонть элес
Ёртсак седееть, кона пись.
Кадык сётордыть весе эзнеть,
Турвачирестэть пурги верь,
Тон – оляват, тон пансттнэнь сезнить,
Те тонь ардомась кепедсь зэрть.
Те тонь ардомась кепедсь варма,
Чизэ верев тонь вийсэ кузсь,
Ды – тонь кисэ ды тонь кувалма –
Модась лиякс чарамо тусь.
Свидетельство о публикации №118082007830