Сатира

Вуч хабар,лагь ава,дуст,мад куьн авай а дереда,
Гьикl я килфет,дуланмишвал куь-хъуьтlуьн и береда?

Цlийи гатlумнава кьуьд,им гьеле вуч я-гуьгъ ава,
Къуьл цанач,верч кутунач,дам-чlередик нез,цlуьгъ ава,
Гъеридин тlвар на къамир,неъ-гьеле кварце тугъ ава,
Газ,кlарас вучда авачтlа-самавурдин бугъ ава,
Вуч хабар,лагь ава,дуст,мад куьн авай а дереда,
Гьикl я килфет,дуланмишвал куь-хъуьтlуьн и береда?

Низ ганай шаз куьне сес-хьайла депутат хкягъиз,
Куьн авай гьа са итим гагь кьабулиз,гагьни негьиз,
Зегьметар буш феначир хьи-хьанани дугъри жагъиз,
Атанайни эхир ам гьа куьне лузвайни рекъиз,
Вуч хабар,лагь ава,дуст,мад куьн авай а дереда,
Гьикl я килфет,дуланмишвал куь-хъуьтlуьн и береда?

Мектебдин гьал чида заз-бес авани аптека квехъ,
Гьиниз агакьзава гъил,тlар хьайитlа бес куь са хъвехъ,
Яд аван хъваз,куь крантда,хкяхьиз ян хуьруьн экв,
Хиве кьунар пара жедиди я,жер кьван сиве тlвек...
Вуч хабар,лагь ава,дуст,мад куьн авай а дереда,
Гьикl я килфет,дуланмишвал куь-хъуьтlуьн и береда?

Маса гуз тир куьне чил,бес амани квехъ уьруьшар,
За лагьанвай веже къвеч чил маса гунин еришар,
Хтанан куь депутат садра хуьруьз,из гуьруьшар,
Къизилар гун хиве кьунвай-ганани гьич гимишар,
Вуч хабар,лагь ава,дуст,мад куьн авай а дереда,
Гьикl я килфет,дуланмишвал куь-хъуьтlуьн и береда?

Гьикl я бес тербия-талим куь жегьилрин арада,
Авани квехъ са клуб-мад куьн амач гьа,дарада,
Гъанан асфалт депутатди,акъудиз хуьр кьарадай,
Вичи хиве кьунавайбур эцигиз ян чарадал,
Вуч хабар,лагь ава,дуст,мад куьн авай а дереда,
Гьикl я килфет,дуланмишвал куь-хъуьтlуьн и береда?

Аван агъсакъкъал итим,рехъ къалуриз,бес куь хуьре,
Я тахьайтlа хьанава айна са затl-кимни дере,
Эл-адатрин,амани бес гьамишан хьизни ери,
Вуч тир атай и девир,заз вуна лагьтlун я мерес-
Вуч хабар,лагь ава,дуст,мад куьн авай а дереда,
Гьикl я килфет,дуланмишвал куь-хъуьтlуьн и береда?
12.07.18 г.