Са сеферда

Са сеферда зун яргъарай хтана
Къекъвезавай Дербент шегьерд базарда.
Гьар жуьредин емишар гваз атана
К1ват1 хьанавай дуьнья иниз, ухшардай.

Лацу, ц1ару, къизил, гимиш парталар
Алайбурун, кьуд патариз нурар гуз,
Арадавай экъуьгънариз амбалар,
Алуд ийиз рекьеллайбур румар гуз.

"Эй кшини, вай кшини, гьай кши!"-
Авайди са кшидин т1вар-ван хьана.
Садни авай гьарайиз: "Чай, чай кши!"
Килигзавай зун иниз гьейран хьана.

Дербенткъала - девлет авай шегьер я,
Халкьар к1ват1из, аквар гьалда виринрай.
Ин авайди гьа заз таниш тегьер я:
Мукъаят хьун герек ама жибинрал.

Атирдикай рахуналди хийир туш:
Шейэрилай ниэд к1ват1ал зурба я.
И карни я и шегьердин таъсир туш,
Вуч авурай: ам са гуьт1уь турба я.

Инхъай-анихъ, анхъай-инихъ къвез-хъфиз,
Гурлу вац1ун дар хьанавай хел хьтин.
Садбур ава шегьерда къекъвез хъфиз,
Дегиш хьанвач, амазма эвел хьтин...

Нисин хьанва, шарабандал вил алаз
Къекъведай кьван лап бегьем галат хьана.
Жибинрални к1ан я ина гъил алаз,
Гьар декьикьа герек мукъаят хьана.

Ингье "Дербент-Рутул" алаз пелелай,
Дяведай хьиз хтай са зат1 атана.
Шалта-шулта, парар хъяна эвелай,
Эхир лугьун, сиве-сивди ац1ана.

Ч1икь-п1икь ийиз, са пад кьиц1и лам хьтин
Алкьуна чун явашдаказ чкадлай.
Чи шофирни, бегьем са вагьрам хьтин,
Алайди тир и машиндални фадлай.

Гьа ик1а чун шегьре рекьиз акъатна.
Таптамишиз, сада садаз т1ушар гуз,
Сад муькуьдан мет1ерални аватна,
Къал-макъални акъатнавай, зурар гуз.

И гьал акур лагьана гьалзавайда:
"Гьяркьуьбуру пул гуда кьве билетдин!"
И ван хьайи ан авайбур гьасятда
Секин хьана, чукьни тийиз гьажетдин.

Кьани вад тир вири авай чкаяр,
Са яхц1ур кас ацукьайла кьулухъди,
Вад инсандин чкани гьак1 араяр
Амазамай. Мумкин тир хьун артухни.

Рекье-хуьле къулайвални хъсан я,
Жувакай гьич бизар тийиз къуншияр,
Ик1 тахьайт1а рекьевайдаз зиян я-
Гьуьрмет хуьдай инсанар я дагъвияр.

Яваш-яваш ихтилатар кватна,
Фикир тагуз кьец1и ламран хесетдиз.
Арадални ятар-фуар акъатна,
Наразивал элкъвена фад гьуьрметдиз.

И арада сада ван-сес хкажна
К1ел ийизва газетдилай шиирар.
Патав гвайда, яхун къуьнер агажна,
Ачух ийиз келледавай фикирар,

Лагьана: "Зун и шаирдал пехил я:
Цвецрекайни кхьизва, уст1ар хьана.
Заз к1ан хьанай асландикай делил са
Кхьиз, амма хьайиди тек ц1ар хьана!"

"Цвецерикай кхьин зурба талант я!"-
Ик1 лагьана бармак алай итимди.
"Халисан шаирдиз а кар асант я!"-
Давамарна фес алай са малимди.

"Куьн никай рахазва азиз стхаяр?-
Хабар кьуна дишегьлиди паталлай,-
Вуж я адан мукьва-кьили, архаяр?"
"Ам цвецерин пачагьд хва я камаллай,-
Кьулухъай хьиз лагьана са кьвезида,-
Цал-цлавай къунши я, зи хъвалаллай".

"Я стхаяр! Куь тарифар ч1уру я:
Цвез гьинай я, аслан гьинай, килиг куьн?-
Ик1 лагьана сада , чухваз чуруяр,-
К1ант1а гьа цвецрен чкадал эциг куьн".

Ягьантарни хъуьрер хьайи ч1авуниз,
Ч1ал дегишна газет гвай халуди.
Жегьиларни акъатнавай тавуниз,
Цвецерикай багьна хьана далудиз.

Муькуь чинай, элкъуьрна гил газетдин,
К1ел ийизва кулхуздин бегьердикай.
Шикилн алаз, к1венк1ве авай зегьметдин,
Ац1ай са чин кхьенва лежбердикай.

"Трактор хьиз и касни гьак1 яман я:
Югъди-йифди цанар цазва ник1ера.
Ибур себеб чи уьмуьрни хъсан я,
Амма садбур ацукьзава шегьерра"-

Тестикьарна сада, къулни эцигна.
Мад лагьана:"Имайни са талант я!"
Патав гвайда, фес мет1ерал эцигна,
Давамарна:"Лежбердиз ам асант я!"

"Куьн никай рахазва, а чан стхаяр?"-
Хабар кьуна мад гьа папа паталлай.
"Квез чидачни адан мукьва-архаяр?
Ам езне я директордин кьвалалай!"

"Ааа!"- лагьана, яргъи Самур вац1 хьтин,
Сес акъатна са сивяй гил виридан.
Шофирдини, дак1унвай са яц хьтин,
Мад лагьана:"Вуч акъатда угъридай!"

"Арабада ацукьнай зун фицакьра.
Тумар-кьилер, тхуларни ч1ур хьана.
Сад хьайт1ани трактордал ацакьра,
Са йикъалай жеда лап какур хьана",-

Ик1 лагьана гил са мукьва миресди,
Чин чуьхвена ч1ехидан, вич алачиз.
Са легьзеда шарабанда са сесни,
Т1вет1веринни, дарман патал амачир.

Сад лагьана,садай гьарай акъатна:
"Я кьейи хва, чинар чуьхуьз аламаз,
Кьилеллайди гьи кьарадиз аватна?
Килигда зун ви гьаядиз, аква ман!"

Атай Ч1авуз нубат гъутар-реперал,
Ч1икь-п1икьдикай рекьин кьулал йикь хьана.
Шофирдини гана хъсан сеперар:
Ин хьайиди лап са йикь-кьиникь хьана.

Авудна халкь, машиндавай шегьредал:
Бахтунай, машинни инал туьхвена.
Румар гана са сятда, са жуьреда
Хутда туна, яваш-яваш хъфена.

Ч1икь-п1икьзавай машиндикай тар хьана
Къугъвазавай, ширин сесер акъудиз.
Галатнавайбурни, к1вачер т1ар хьана,
Ахваравай, са виндикьни такъудиз.