Ахцегь дере капун юкьвал
Алай хьтин аквазвай заз.
Самур вац1ни мукьвал-мукьвал,
Шур-шур ванцел рахазвай заз.
Тик дагъларин зурба гьайбат,
Цифери куьна лепе гузвай.
Хуьрер дегиш жез нубат-нубат,
Ахцегь хуьруьв мукьув жезвай.
Гьикьван душмандин гуьлледин,
И дагълариз ван хьанат1а?
Шумуд жегьилди и дередин,
Дявед рекье чан ганат1а?
Бажарагълу кьегьалрин Ватан,
Зун чилел ви мугьман яз агакьнай.
А ч1авуз т1ебиатдин гьар лишан,
Хъипи зулун тегьер ч1угваз алахънай.
Эмирован гуьмбетдин ценерив,
Къизилгуьлер к1унчуна эцигнай.
Кьакьан хьанвай тарарин хилерик,
Аквазвай шабалатар гилигна.
Абукевсер ятар авай яйлахар,
Гьамамар чиле гугурт ргазвай.
Гуьлуьшан яз акъвазнавай Ахцегьар,
Гьар са хуьре кьет1ен нугъат рахазвай.
Ахцегь дере
© Copyright: Султанова Сильвана, 2018
Свидетельство о публикации №118051608848
Свидетельство о публикации №118051608848
Рецензии