Зи хуьр

 Зи хайи хуьр зи к1ени хуьр
Хкажда за винерал.
Ви няметри къуват гана ,
Уьтквем хьанвай гъилерал

 Лондон, Париж , Брюссель , Гаага
И дуьньядин кьуд пип/е
Къекъвенай зун зи хайи хуьр
Анжах, вун аваз рик1е.

Жагъанач гекъигдай са зат1
Заз, зи хуьруьн акунар.
Хуьр я женнет! Маса женнет
Я, гьак/ан буш рахунар.

Вири дуьнья к/вачик ква зин
Рекьер аваз къекъведай.
Анжах са рехъ хуш я заз лап
Хайи хуьруьз хуькведай.

 К/вачи-к/вачи къекъвейт1ани
Зун а рекье галатдач
Гьа к1вализ кьван хикида зун
Хуьрни рик1яй акъатдач.

Агь, багьа рехъ къимет ганвай
Маса , вири рекьери.
Хайи хуьруьз хкана зун
Икрам ийиз цуьквери.


Гьавада авай фан атир
Лезги руша чразвай
Япарани ч1ал таниш тир
Зи диде хьиз рахазвай.

Тадиз кьуна темен гана
Заз зи к1валин нефесди.
Лагьана "куьз яргъал хьана"
Кьунвайни вун кьефесди?

 Париж, Лондон , Шанхай , Гаага
Хайи к1валин цлар я.
Ватан ширин я чаз пара
Бубайрин гьахъ гафар я.

Лигим хьанвай Ватандин фу
Ц1ай гайила ц1амарин.
Т/уьрла тадиз артух хьанай
Йигинвал зи камарин.

Рик1ин къене ц1ай куькуьрна
Хуьруьн хьра гайи ву.
Къагьриман я зи Ватандиз
Вафалувал хвейи ву!