Алатна фена са шумуд йисар,
РикIел алама вахтар чи жегьил.
Финни рикIелай уьмуьрдин тарсар?
ХьанватIани жув къужа хьиз агьил.
Ахварайни вун, вил галаз, такваз,
Алудзава за хажалат йифер.
РикI акъатзава, чIередал къугъваз,
Акур вахтунда сад садахъ лифер.
Вун мад са сефер шадвилив хъуьрез,
Ахкун хъувунихъ вил галама, вил.
Муьгьуьббатдикай вав рахаз серес,
Са декьикьадихъ вил галама, вил.
Вун, рикIе шикил туна, катнава,
Ядигар ягълух амаз ви гъилин.
Зун хажалатрин юкьва гьатнава,
МичIи тир йифиз, тама хьиз къалин.
Садра кьванни вун ахквадач жал мад,-
Лугьузва рикIи, рекьидай кьиляй.
Уьмуьрни кIамач, бахтлу тир ва шад,
Рекьиз кIанзава кьисметдин хъиляй.
Вун мад са сефер шадвилив хъуьрез,
Ахкун хъувунихъ вил галама, вил.
Муьгьуьббатдикай вав рахаз серес,
Са декьикьадихъ вил галама, вил.
Вил галама, вил
© Copyright: Сажидин Саидгасанов 4, 2018
Свидетельство о публикации №118040204643
Свидетельство о публикации №118040204643
Рецензии