Ана десем, язбаш тува гёз алда,
Дюньялагъа атир ийис яягъан;
Ана десем, янгур тува гёз алда,
Айлананы чангын, насын чаягъан.
Ана десем, гюл бав тува гёз алда
Гьар гюлюнден мен минг сююнч алагъан;
Ана десем, умут тува гёз алда
Юрегиме парахатлыкъ салагъан.
Шавлалары иситеген санымны,
Ана десем, гёзлер тува гёз алда;
Алгъыш болуп юрегиме, жаныма,
Ана десем, сёзлер тува гёз алда.
Ана десем
© Copyright: Нурьяна Арсланова, 2018
Свидетельство о публикации №118032802453
Свидетельство о публикации №118032802453
Рецензии