Юлдуз тувду
Яшдан берли юлдузлагъа гьашыкъман,
Гече-гече гьасиретмен гёрмеге.
Лап ярыгъын юлкъуп алып кёклерден
Бирев сама болармыкен бермеге.
Аяз гече… Гёзел гече… Чув гече…
Юлдуз юлкъма болмайгъанны англайман.
Юрегимни тюбюндеги юрекни
Аста-аста урувуна тынглайман.
Аяз гече… Гёзел гече… Чув гече…
Англамайман, тюлмю? Яда тюшюмде
Ана болдум… Азиз балам биринчи
Тынышларын ала, ятып тёшюмде.
Ана болдум… Гьар алажакъ тынышым
Балам булан бир тенг этип бёлердей,
Тарыкъ болса, насиби учун яшымны
Яшавумну къызгъанмайлы берердей.
Ана болдум… Гёк булутлар япмасдай,
Учурмасдай къутургъан баш еллер де,
Кёклердегин чанг бюртюкге ошатып,
Лап да ярыкъ юлдуз тувду ерлерде.
© Copyright: Нурьяна Арсланова, 2018
Свидетельство о публикации №118032802438
Свидетельство о публикации №118032802438
Рецензии