Къайгъыдан дёндюрме яшларын -
Атамны гюнлерин санама...
Дертлерден тюйдюрмей къашларын,
Оьмюр бер, Тенгирим, Анама...
Байлыкъны аршлагъа чюймеймен,
Сёнмес от якъмасын башымны.
Къоркъаман оьтесиз, сюймеймен
Къайгъысын гёрмеге яшымны.
Атасыз яш къушдур къанатсыз,
Шондан авур дерт ёкъ балагъа.
Яшларым къалмасын Атасыз -
Къанатсыз гюн берме олагъа.
Къайгъылар гёрсетмей гёзюме,
Дертлерден тюйдюрмей къашларым...
Оьмюр бер, Тенгирим, оьзюме -
Анасыз къалмасын яшларым.
Тилевюм къабул эт, Аллагьым...
© Copyright: Нурьяна Арсланова, 2018
Свидетельство о публикации №118032802406
Свидетельство о публикации №118032802406
Рецензии