Ёлукъдур

Бек алгъасап, ишден уьйге бараман,
(Ишден, ачдан юрек уьйню сагъына)
Гёрген сайын ашамай да тоягъан
Балдан татли яшларымны ягъына...
 
Огь, нече де кёпге гёзюнг илине
Янгъа бакъсанг, ой тайдырып каламдан.
Гьеч зат тапмай илиндирме аягъын,
Ерде бир жан кёмек излей аламдан.
 
Тырпыллайгъан жанны къыйын гьалларын
Ойлап алсанг юрек тамур тююле:
Болма ярай, авлетлери къарагъан
Мендей о да бир анадыр, ким биле.
 
(Англавум ёкъ оьмюр чакъдан жандагъы,
Англамагъа къарасам да ярасын)
Яда буса бир етимдир, баягъы,
Мендей инсан таптап гетген анасын.
 
...Ерден табып салам гесек узатып,
Эс этерден тартынмайлы гьеч бирев,
Зор бек уллу умутуна ёл ачып,
Ёлгъа салдым ёлдашымны гиччинев.
 
Аллагь мени адам этип яратгъан,
Жаны баргъа языкъсынып билсин деп,
Бек алгъасап барар ёлдан айланып,
Гючсюз жангъа къол узатма гелсин деп.
--
...Яратгъаным, арек этгир гюнлерден
Яшыбызны гючю кёпге бозартар,
Яда буса Сен ёлукъдур олагъа
Бусурманны «салам гесек» узатар...