Бугюн йимик гьалиден кёп алда да,
Бирлер магъа: "Оьктем къыз!" – дей къала эди.
Шо сёзлени англамай тюп маънасын,
Яш юрегим бираз пашман бола эди.
"Оьктем булан нечик къурдаш болдунг?!"– деп
Къурдашыма сорай туруп талгъанлар,
Бугюн мени ожагъымдан таймайгъан
Жан айырмас къурдаш болуп къалгъанлар.
Шо сёзлерде илыкъма зат бармыкен?!
Оьктемлиги ёкъну, айт, ким сан гёрген...
Баш иймейли душманыны алдында
Оьктем эрлер дав майданда жан берген!
Умутларын ерден кёкге элтеген
Бир оьктемни кёпюрюмен, гьызыман...
Оьктемлиги къулланы ят этеген
Мен чи дагъы оьзден Халкъны къызыман!
Оьзден халкъны къызыман
© Copyright: Нурьяна Арсланова, 2018
Свидетельство о публикации №118032604084
Свидетельство о публикации №118032604084
Рецензии