Тюнегюнгю язгъы гюндей чагъыбыз
Боран алып барагъандай бугюнге.
Мени булан къайгъырадыр табиат
Инамсызлыкъ салгъан дертден тююнге.
Язгъы гюндей бир иржайып багъасан,
Бир де ёкъсан язда янгур чакъы да.
Чакъдан да чалт тюрленеген сюювге
Гьайран бола табиатны чагъы да.
Янгур явуп бары ерни сув алар,
Елден чачлар етти янгъа чачылар.
Амма артда болмагъандай ёкъ болуп,
Ай-гюн чыгъар, ерлер-кёклер ачылар.
Ахыр бир гюн ачылажакъ чакъ йимик,
Сюювюнг де "ачылар" деп белсенмен.
Бир гюн бою бир минг тюрлю болса да,
Чакъгъа артыкъ инанаман сенден мен.
Чакъгъа артыкъ инанаман
© Copyright: Нурьяна Арсланова, 2018
Свидетельство о публикации №118032604044
Свидетельство о публикации №118032604044
Рецензии